ШҚО-да қаржы пирамидасын құрған әйел ұсталды
«Шығыс Қазақстан облыстық ІІД Ұйымдасқан қылмыспен күрес басқармасы қызметкерлері 50 жастағы Өскемен қаласының тұрғынын қолға түсірді. Ол қала орталығында ЖШС ретінде кеңсені жалға алып, «Bank of Kingdom» деген ағылшындық жалған банктен 100 000 еуро көлемінде пайыздық үстемесіз несие беріледі деген желеумен жұртты алдап келген. Шетелдік банктен несие алып беру үшін жеке тұлғалар үшін 75 000 теңге, ал заңды тұлғалардан 180 000 теңге ақша талап еткен. Тіпті кейбір клиенттерге қолдан жасалған банктің төлем карточкаларын беріп, оған жақын күндері ақша түсетінін айтып сендірген. Атап өтерлігі пластик карточкаларды 20 000 теңгеге бағалаған», - деді ШҚО ІІД ҰҚКБ басшысы Абай Бақтияров.
А.Бақтияровтың айтуынша, жалған құжаттар мен карточкалар тәркіленген. Алаяқтық фактісі бойынша қылмыстық іс қозғалып, қазір тергеу амалдары жүріп жатыр. Алаяқтың құрбаны болған 20 адам полицияға шағым түсіріпті. «Біздің мәліметтерімізге қарағанда оңай жолмен пайдаға кенелмек болып ақшасынан айырылып қалғандар қатары бұдан әлдеқайда көп болуы мүмкін», - деп қорытындылады ол.
Негізі: BNews.kz, 24 қан 2014
Тағы да оқу
|
